रौतहट– बम विस्फोटपछि इँटा भट्टामा हालेर जिउँदै मारिएका भनिएका ओसी अख्तर विदेशमा रहेको भन्दै उनकी पत्नी अमना खातुनले जिल्ला अदालत रौतहटमा निवेदन दिएकी छन् ।

घटनामा ज्यान गुमाएका भनिएका त्रिलोक प्रताप सिंह र ओशी अख्तर मारिएको भन्दै परिवारले प्रहरीमा किटानी जोहरी दिएको थियो । तर ओसी अख्तरकी पत्नीले भने आफ्ना पति इँटा भट्टमा नमारिएको बरु विदेश गएर नफर्किएको भन्दै निवेदन दिएकी छिन् ।

२३ जनालाई जिउँदै इँटा भट्टामा हालेर हत्या गरेको अभियोगमा नेपाली कांग्रेसका नेतासमेत रहेका सांसद मोहम्मद अफताव आलमविरुद्ध बिहीबारै बयान सकिएपछिअमना अदालत पुगेकी हुन् ।

प्रहरी र जिल्ला सरकारी वकिलको कार्यालयमा पति ओसी अख्तरलाई आलमले जिउँदै इँटा भट्टामा हालेर मारेको बयान दिएकी उनले अचानक जिल्ला अदालतमा बयान फेर्दै लिखित निवेदन दिएकी जिल्ला अदालत रौतहटका श्रेष्तेदार गुणराज पराजुलीले जानकारी दिए ।

अदालतमा अहिले पूर्वमन्त्री एवं सांसद मोहम्मत आफताब आलमको थुनछेक बहस चलिरहेको छ ।