कास्की– प्रहरीले जुवा खेल्ने र खेलाउने गरेको आरोपमा पोखराका दुई स्थानबाट २५ जनालाई पक्राउ गरेको छ।

उनीहरुको साथबाट प्रहरीले २ लाख ७३ हजार ४३ रुपैयाँसमेत बरामद गरेको जिल्ला प्रहरी कार्यालय कास्कीका प्रवक्ता एवं डिएसपी राजकुमार केसीले जानकारी दिए।

पोखरा ३२ तल्लो गगनगौडास्थित जंगबहादुर पुनको घरमा प्रहरीले छापा मारेको थियो। घरधनी पुन सहित उक्त ठाउँबाट १९ जना पक्राउ परेको प्रवक्ता केसीले जानकारी दिए। उनीहरुबाट १ लाख ६ हजार ७ सय ४८ रुपैयाँ र ८ बुक तास प्रहरीले बरामद गरेको छ।

त्यस्तै पोखरा ९ प्रगतिमार्गस्थित चन्द्रबहादुर गुरुङको घरमासमेत छापा मार्दा घरधनी गुरुङसहित ६ जनालाई पक्राउ गरिएको प्रवक्ता केसीले बताए।

उनीहरुको साथबाट १ लाख ६६ हजार २ सय ९५ रुपैयाँ र ४ बुक तास बरामद गरेको जनाइएको छ। पक्राउ २५ जना विरुद्ध नै जुवा मुद्दामा म्याद थप अनुमति लिई कारवाही प्रक्रिया अघि बढाइएको प्रवक्ता केसीले जानकारी दिए।