रामेछाप- आफ्नै समकक्षीबाट असुरक्षित रहेको आरोप लगाउन गाउँ पालिका अध्यक्षलाई पार्टीले निलम्बन गरेको छ ।

रामेछापको लिखु तामाकोशी गाउँपालिका अध्यक्ष गोविन्दबहादुर खड्कालाई उनको पार्टी सत्तारुढ नेकपाले निलम्बन गरेको हो ।

खड्काले आफ्नै पार्टीबाट गाउँपालिकामा चुनिएका जनप्रतिनिधीबाट असुरक्षित रहेको आरोप लगाउँदै महानगरीय प्रहरी अपराध महाशाखामा उजुरी गरेका थिए।

गाउँपालिका उपाध्यक्ष र वडाअध्यक्षले गुन्डा प्रयोग गरेर आफूविरुद्ध षड्यन्त्र गरेको भन्दै खड्काले उजुरी गरेपछि महाशाखाले उनलाई ज्यान मार्नेसम्मको धम्की दिने व्यक्तिलाई नियन्त्रणमा लिएको थियो।

गोलिकान्डपछि खड्काले आफुलाई गाउँपालिकामा रहेका आफ्नै पार्टीका उपाध्यक्ष र वडाध्यक्षले योजनाबद्ध रुपमा सिध्याउने योजना बनाएको आरोप लगाएका थिए। खड्काले गाउँपालिका उपाध्यक्ष तथा नेकपा जिल्ला कमिटी सदस्य दीपशिखा दाहाल, नेकपाका अर्का नेता ध्रुव कार्की र वडा नम्बर ७ का वडाध्यक्ष सुवास बोहोराविरुद्ध किटानी जाहेरी दिएका थ‍िए ।

यता पार्टीले भने आपसी छलफल र सम्बादबाट समस्याको समाधान खोज्नुको साटो पार्टीको नीति र अनुशासनविपरित काम गरेर सहकर्मीहरुलाई झुठा मुद्दामा फसाउन पदको दुरुपयोग गरेको भन्दै पार्टीबाट निलम्बन गरेको छ ।

खड्कालाई नेकपाको प्रदेश कमिटीले कारबाही गर्न जिल्ला कमिटीलाई निर्देशन दिएको थियो ।