कुवेत सिटी– सन् १९९१ मा भएको खाडी युद्धका क्रममा हराइरहेका ४८ कुवेती नागरिकको अवशेष इराकले कुवेतलाई हस्तान्तरण गरेको छ ।

कुवेती झण्डा ओढाइएका काठका बाकसमा उनीहरुको अवशेष कुवेतसमक्ष हस्तान्तरण गरिएको हो । गत मार्च महिनामा समावा शहरभन्दा १७० किलोमिटर पश्चिममा फेला परेको सामूहिक चिहानमा उनीहरुको अवशेष फेला परेको र आवश्यक परीक्षण पछि उनीहरु कुवेती नागरिक भएको पुष्टि भएपछि कुवेतसमक्ष हस्तान्तरण गरिएको इराकी अधिकारीले जनाएका छन् ।

सन् २००३ मा अमेरिकाले इरकविरुद्ध आक्रमण गरी सद्दाम हुसैनलाई सत्ताच्यूत गरेपछि इराकले कुवेतसमक्ष कुवेती नागरिकको अवशेष हस्तान्तरण गरेको यो पहिलो घटना हो । इराक सरकारले खाडी युद्धमा हराइरहेका कुवेती नागरिकहरुको अवशेषको खोजी गरी त्यसलाई कुवेतसमक्ष हस्तान्तरण गर्न प्रतिबद्ध रहेको जनाएको छ ।

सन् १९९१ मा इराकले कुवेतमा आक्रमण गरी ७ महिनासम्म कब्जा गरेको थियो । त्यसबेला कुवेतबाट ६ सय ५ जना बेपत्ता पारिएको कुवेतको भनाइ थियो । खाडी युद्धका क्रममा अमेरिकाले कुवेतको साथ लिई इराकविरुद्ध आक्रमण गरेपछि इराकले कुवेत छाड्नु परेको थियो ।