काठमाडौं– अमेरिकाको न्यूयोर्कमा आगामी अगष्ट १७ मा ‘नेपाली ढाका फेशन शो’ हुने भएको छ । ‘मिस नेपाल अर्थ अमेरिका’को कार्यक्रममा मोडलहरु नेपाली ढाकाको पहिरनमा र्‍याम्पमा उत्रिन लागेका हुन् ।

विगत १७ वर्षदेखि व्यावसायिकरुपमा नेपाली ढाकाका विभिन्न डिजाइन तयार पार्दै आएकी कल्पना लिम्बूले डिजाइन गरेको नेपाली ढाकाको पोषाकहरु मोडलहरुले पहिरिनेछन् ।

वि.स. २०६४ सालमा ‘द हाइल्याण्ड आर्ट’ को दर्ता गरेर व्यावसायिक रुपमा ढाका कपडाको व्यवसाय सुरु गरेकी कल्पनाले आफूले तयार पारेको पोशाकले अमेरिकी फेशन शोमा स्थान पाउँदा गर्ब लागेको बताइन् ।

उनले आफूले डिजाइन गरेका नेपाली ढाकाका पोषाकहरुको अन्तर्राष्ट्रिय बजारमा माग बढ्दो भए पनि अन्तर्राष्ट्रिय स्तरको कार्यक्रममका लागि भने पहिलो पटक माग भएको बताइन् ।

खबरहबसँग कुरा गर्दे कल्पनाले भनिन्, ‘विदेशमा हुने कार्यक्रममा मैले बुनेका पोषाकले स्थान पाउनु गर्बको विषय हो, अमेरिकामा नेपाली ढाकाले स्थान पाउनुमेरो लागि मात्र नभएर नेपालकै लागि खुशीको कुरा हो ।’

अमेरिकाको टेक्सासस्थित टिसा कम्पनीसँग ‘द हाइल्याण्ड आर्ट’ कम्पनी जोडिएको बताउँदै उनले भनिन् ‘त्यही कम्पनीमार्फत मैले नेपाली ढाकाको डिजाइन गरेर कपडा पठाउन लागेकी हुँ, कपडा तयारी भइसकेको छ ।’

उनले आफूले डिजाइन गरेका ढाकाका पोषाकहरु मुलुकका विभिन्न स्थानमा भएका ४० वटा भन्दा बढी फेशन शो हरुमा प्रयोग भइसकेको बताइन् ।