काठमाडौं – हास्य जानरामा निर्माण भएको फिल्म ‘फाटेको जुत्ता’ नेपालमा युट्युबको ट्रेन्डिङ नम्बर १ मा परेको छ । हाइलाइटस् नेपालको च्यानलबाट शुक्रबार सार्वजनिक गरिएको यो फिल्मलाई दर्शकले मिश्रित प्रतिक्रिया दिएका छन् ।

सौगात मल्ल, प्रियंका कार्की, कामेश्वर चौरासिया, रविन्द्र झा, अनोज पाण्डे लगायतका कलाकारको शीर्ष भूमिका रहेको यो फिल्मलाई हलमा भने दर्शकले खासै साथ दिएका थिएनन् । भलै फिल्मले लगानी सुरक्षित गरेको भनिएको थियो ।

यो फिल्ममा अर्जुन कुमारको लगानी र निकेश खड्काको निर्देशन छ ।

निरोज महर्जनले लेखेको यो फिल्ममा दीर्घ खड्काको सम्पादन, निरज कँडेलको छायांकन र अष्ट महर्जनको द्वन्द्व निर्देशन छ ।

युट्युबमा फिल्म हेरेका दर्शकले हेरेका दर्शकले कमेन्टमा मन परेको भन्दा मन नपरेको प्रतिक्रिया बढी दिएका छन् । ‘कस्तो फिल्म, न कथा छ, न त अभिनय, न दमदार डायलग नै छन्, न त क्लाइमेक्स नै गतिलो छ,’ एक प्रयोगकर्ताले कमेन्ट छोडेका छन् । त्यस्तै मनोज पाण्डेले लेखेका छन्, ‘नायिकाको लवज तराईको नै छैन, नायिकामा प्रियंका कार्की फिटिक्कै सुहाएन ।’

अर्का एक प्रयोगकर्ताले भने युट्युबमा निःशुल्क हेर्नुपर्दा पनि टाउको दुखेको र झन् हलमा पैसा तिरेर हेर्दा कति आपत पर्‍यो होला भन्दै कमेन्ट गरेका छन् ।

अर्जुन रानाले लेखेका छन्, ‘आशा गरेजस्तो लागेन ।’

केहीले भने फिल्म मन परेको प्रतिक्रिया दिएका छन् । धेरैले अभिनेता सौगात मल्लको अभिनय मन परेको प्रतिक्रिया दिएका छन् । हलमा फिल्म हेर्न नपाएका र विदेशमा हुने नेपालीबीच भने यो फिल्मको लामो समयदेखि प्रतीक्षा थियो ।