काठमाडौं- मिडिया काउन्सिल विधेयकको विरोधमा पत्रकारहरुले मानव साङ्लो बनाउदै प्रर्दशन गरेका छन् । नेपाल पत्रकार महासंघको आयोजनामा शनिबार दिउँसो ३ बजेदेखि ४ घण्टासम्म राजधानी काठमाडौंको बबरमहलमा पत्रकारहरु भेला भएर एकअर्काको हात समाएर मानव साङ्लोसहितको प्रर्दशन गरि मिडिया काउन्सिल विधेयकको विरोध गरेका हुन् ।

प्रदर्शनमा विभिन्न सञ्चारमाध्यमका पत्रकार सहभागिता रहेको थियो ।आँखामा कालो पट्टी बाँधेका पत्रकारहरुले स्वतन्त्र प्रेसको पक्षमा नाराबाजी गरेका थिए । पत्रकारहरुको मानव साङलो बबरमहलदेखि नयाँ बानेश्वरसम्म पुगेको थियो । मानव साङ्लो कार्यक्रममा पत्रकार महासंघका पूर्व पदाधिकारी, विभिन्न सञ्चार गृहका सम्पादक, पत्रकारहरुको उल्लेख्य सहभागिता थियो ।

पत्रकार महासंघका पूर्व अध्यक्ष सुरेश आचार्यले पत्रकार महासंघ वार्ताका लागि तयार रहँदा पनि सरकारले वेवास्ता गरेकाले आफुहरु स्वतन्त्र प्रेसका लागि सडक संघर्षमा उत्रनु परेको बताए । स्वतन्त्र प्रेसका लागि विगतमा पनि अन्तर्राष्ट्रिय मिडिया मिसन नेपाल आएको सन्र्दभ उल्लेख गर्दै उनले आवश्यक परे अहिले पनि बोलाईने चेतावनी दिए ।

प्रेसलाई अंकुश लगाउने गरी सरकारले मिडिया काउन्सिल विधेयक ल्याएको भन्दै संचारकर्मी, मानवअधिकारकर्मीलगायतले विरोध गर्दे आएका छन् । पत्रकार महासंघले विधेयकको विरोधमा चरणबद्ध रुपमा विरोध कार्यक्रम गर्दै आएको छ । प्रमुख प्रतिपक्षी दल नेपाली कांग्रेसले पनि मिडिया काउन्सिल विधेयकको विरोध गरेको छ ।