काठमाडौं । नक्कली शैक्षिक प्रमाणपत्र पेस गरी नियुक्ति लिएको भन्दै अख्तियार दुरुपयोग अनुसन्धान आयोगले सशस्त्र प्रहरी बलका प्रहरी सहायक निरीक्षक इन्द्रबहादुर चन्दविरुद्ध विशेष अदालतमा मुद्दा दायर गरेको छ ।

असई चन्दले नक्कली शैक्षिक प्रमाणपत्र पेस गरी सेवारत रहेको उजुरीमाथि छानविन गरी अख्तियारले मुद्दा दायर गरेको हो । चन्दले सहायक निरीक्षक पदमा नियुक्तिका क्रममा माध्यमिक शिक्षा परिषद्, उत्तरप्रदेश भारतबाट प्राप्त गरेको भनिएको इन्टरमिडियट तहको प्रमाणपत्र नक्कली रहेको अख्तियारको दाबी छ ।

भ्रष्टाचार निवारण ऐन, २०५९ को दफा १६(१) को कसुरमा मुद्दा चलासँगै चन्द स्वतः निलम्बनमा परेका छन् । अख्तियारको दाबी ठहर भएमा उनलाई ६ महिनादेखि एक वर्षसम्म कैद र दश हजार रुपैयाँदेखि २० हजार रुपैयाँसम्म जरिवाना हुनेछ ।