बेलायत– गत सोमबार पुत्रलाभ भएका बेलायती राजकुमार तथा राजकुमारीले शिशुलाई सार्वजनिक गरेका छन् । बेलायत राजकुमार ड्युक अफ ससेक्स ह्यारी तथा डचेस अफ ससेक्स मेगनले बेलायतको विण्डसर दरबारमा रहेको सेन्ट जर्जको हलमा नवजात शिशुलाई सञ्चारमाध्यमका अगाडि सार्वजनिक गरेका हुन् ।
आफ्नो परिवारमा नयाँ सदस्यको आगमन जादूजस्तै भएको राजकुमारी मेगनले बताएकी छिन् । शिशुलाई जन्म दिँदा आफू निकै हर्षित भएको समेत उनको भनाइ छ । उनले छोराको जन्म ‘सपनाजस्तै’ भएको जनाएकी छिन् । राजकुमार ह्यारीले पनि छोरालाई जन्म दिँदा आफू निकै हर्षित भएको तथा छोराको हेरचाह र रेखदेखका लागि आफूले पर्याप्त समय दिन चाहेको बताएका छन् ।
अब नवजात शिशुलाई लिएर आफूहरु महारानी तथा शिशुकी बुढी हजुरआमा एलिजावेथ कहाँ जाने उनीहरुले जनाएका छन् । गत सोमबार सबेरै जन्म भएको छोराको नाम भने हालसम्म राखिएको छैन । नवजात शिशु बेलायती राजगद्दीको उत्तराधिकारीको रोल क्रममा सातौं नम्बरमा आउने छन् ।
प्रतिक्रिया