एजेन्सी– च्याम्पियन्स लिगमा डच टोली आयाक्स र इङ्ग्लिस क्लब टोनह्यामबीच प्रतिस्पर्धा हुँदैछ । आयाक्सको घरेलु मैदानमा हुने खेलमा लिगको सेमिफाइनलको दोस्रो लेगमा आज (बुधबार) आयाक्स र टोटनह्याम भिड्दैछन् ।

सेमिफाइनलको पहिलो लेगमा १–० को साघुँरो जित हात पारेको आयाक्स घरेलु मैदानमा हजारौं दर्शकको साथमा पाहुना टोलीलाई निरास बनाउने योजनामा रहेको छ ।

तर, टोटनह्याम भने आफ्नो उत्कृष्ट पुनरागमन गर्दै समग्रमा जित निकाल्दै फाइनलमा पुग्ने लक्ष्यमा रहेको प्रशिक्षक माउरिसियो पोचेटिन्होले बताएका छन् । पहिलो लेगमा एक गोलले पराजित भएको टोटनह्यामका महत्वपूर्ण २ खेलाडी मैदान बाहिर रहेका थिए । तर, आजको खेलमा फरवार्ड सन ह्युङ मिन टोलीमा फकिसकेका छन् भने अर्का स्टाइकर ह्यारी केनको स्थान लिने विश्लेषण गरिएको छ ।

टोटनह्यामका प्रशिक्षक आफ्नो टोली पहिलो पटक फाइनलमा पुग्नेमा विश्वस्त रहेका छन् । उनले भने,‘पहिलो खेलको नतिजाले केही हदसम्म अफ्ठ्यारो पार्नेछ । तर, सम्भावना अझै कायम छ । हामीलाई थाहा छ । हाम्रा लागि उत्साहित क्षण हो ।’

साविक विजेता टोली रियल मड्रिड र इटालीयन जाइन्ट युभेन्ट्सलाई घरको टिकट कटाएको आयाक्स पहिलो लेगको नतिजासहित केही दबाब मुक्त रहेपनि टोटनह्यामविरुद्ध राम्रो खेल्नु पर्ने प्रशिक्षक टेन हगले आफ्नो टोली रक्षात्मक खेल्ने बताएका छन् ।

उनले भने,‘हामी यो खेल जित्न चाहान्छौं । त्यसैले हाम्रो माइन्ड सेट भएको छ । हामीले हाम्रो बलियो पक्ष प्रयोग गछौं । हामी यो गर्न सक्छौं । यसमा हामी विश्वस्त छौं ।’

टोटनह्याम र आयाक्सबीचको विजेता टोलीले च्याम्पियन्स लिगको फाइनलमा इङ्ग्लिस क्लब लिभरपुलसँग खेल्नेछ । लिभरपुलले बार्सिलानाविरुद्ध ४–० को नतिजासहित फाइनलमा स्थान बनाइसकेको छ ।