लाहोर– पाकिस्तानको लाहोरस्थित एक सुफी मस्जिद (दाता दरबार) बाहिर भएको बिस्फोटमा ८ जनाको मृत्यु भएको छ । बिस्फोटमा परी २५ जनाभन्दा बढी घाइते भएका जनाइएको छ ।

बिस्फोटमा परि मारिनेमा ४ जना सुरक्षाकर्मीसहित सर्वसाधारण छन् । मस्जिदभित्र महिलाहरु प्रवेश गर्ने मूलद्वारमा बिस्फोट भएको जनाइएको छ ।

यही मस्जिदमा सन् २०१० मा पनि आक्रमण भएको थियो । उक्त आक्रमणमा ४० जनाभन्दा बढीको मृत्यु भएको थियो । इस्लामिक लडाकूहरुले पाकिस्तानमा प्रायः सुफी सम्प्रदायका व्यक्तिमाथि आक्रमण गर्ने गरेका छन् ।

पटकपटक आक्रमण हुन थालेपछि पाकिस्तान सरकारले यस मस्जिदमा सुरक्षा व्यवस्था कडा बनाएको थियो । स्थानीय प्रहरी अधिकारी मुहम्मद काशिफले घटनाको प्रकृति हेर्दा आत्मघाती आक्रमण देखिएको बताए । उनले प्रहरीको सवारीमाथि लक्षित गरी आक्रमण भएको पनि जानकारी दिए ।