काठमाडौं– प्रमुख प्रतिपक्ष दल नेपाली कांग्रेसले आगामी आर्थिक वर्षको बजेटमा सबै प्रदेशको सन्तुलित विकासलाई ध्यान दिन सरकारको ध्यानाकर्षण गराएको छ ।

संघीय संसदको अर्थ समितिमार्फत कांग्रेसले सबै प्रदेशको सन्तुलित विकास हुनेगरी आगामी आर्थिक वर्षको बजेट ल्याउन सरकारको गम्भिर ध्यानाकर्षण गराएको हो ।

नेपाली काँग्रेसका नेता तथा सांसद ज्ञानेन्द्रबहादुर कार्कीले सबै प्रदेशको सन्तुलित विकास हुनेगरी बजेट नल्याए त्यसले असन्तुष्टि जन्माउने र त्यो विद्रोहको रुपमा परिणत हुने बताए ।

बुधबार संघीय संसदको अर्थ समितिको बैठकमा बोल्दै उनले पहुँच र प्रभावको आधारमा नभइ जनताको आवश्यकताको आधारमा प्रतिनिधिसभाको सबै निर्वाचन क्षेत्रमा पनि बजेटको व्यवस्था गर्न सरकारसँग माग गरे ।

कांग्रेस नेता कार्कीले सरकारको एक वर्षे कार्यकाल गफमा मात्रै बितेको दावी गर्दै आगामी ४ वर्ष सदुपयोग गरेर अघि बढ्न पनि सुझाव दिए ।

पूर्व अर्थमन्त्री समेत रहेका कार्कीले बजेटको प्राथमिकता कार्यान्वयनमा विशेष ध्यान दिन अर्थ मन्त्रालयलाई आग्रह गरे ।

नेता कार्कीले आगामी आर्थिक वर्षको बजेटले गरिबी निवारण, बेरोजगारी समस्या समाधानलाई उच्च प्राथमिकता दिनुपर्ने पनि बताए ।