काठमाडौं– प्रधानमन्त्री केपी शर्मा ओलीले मुलुकको समृद्धिका लागि सवैले दत्तचित्त भएर आ–आफ्नो क्षेत्रबाट लाग्नुपर्ने बताएका छन् ।

समृद्धिका लागि आवश्यक वातावरण तयार भएको भन्दै प्रधानमन्त्री ओलीले समृद्धिको अभियानलाई अघि बढाउन आवश्यकता अनुसार संविधान, कानून परिमार्जन गर्दै लैजाने प्रतिवद्धता व्यक्त गरे ।

सोमबार नेपाल उद्योग परिसंघको १६ औं वार्षिक साधारण सभालाई उद्घाटन गर्दै उनले विगतका गलत अभ्यास र परम्परालाई त्यागेर मुलुकलाई समृद्ध बनाउने अभियानमा सक्रियताका साथ लागि पर्न पनि निजी क्षेत्रलाई आह्वान गरे ।

उनले विकासका लागि अब अरुलाई दोष दिएर पन्छिने अवस्था सरकार–निजी क्षेत्र कसैलाई पनि नरहेको स्पष्ट पारे ।

कार्यक्रममा अर्थमन्त्री डा. युवराज खतिवडाले मुलुकलाई समृद्ध बनाउन सरकार एक्लैको प्रयासले मात्रै नहुने बताए । उनले सरकारले मुलुकको समृद्धिका लागि निजी क्षेत्रको योगदानमाथि विशेष जोड दिएको पनि स्पष्ट पारे ।

लगानी सम्मेलनपछि मुलुकलाई समृद्ध बनाउने आधार झनै बलियो भएको उल्लेख गर्दै अर्थमन्त्री खतिवडाले त्यसका लागि आवश्यक सबै खालको नीतिगत व्यवस्था गर्न सरकार प्रतिवद्ध रहेको उल्लेख गरे ।

अर्थमन्त्री खतिवडाले मुलुकको विकासका लागि निजी क्षेत्रकाे भूमिका उल्लेखनीय रहेकाे बताए ।