त्रिपोली– लिबियाको राजधानी त्रिपोली नजिक खलिफा हफ्तार नेतृत्वको सैनिक सरकार र अन्तर्राष्ट्रिय मान्यता प्राप्त सरकारप्रति वफादार सेनाबीच भिडन्त भएको छ ।

मुलुकको अधिकांश भूभाग कब्जा गर्दै राजधानी त्रिपोलीतर्फ अघि बढिरहेको हफ्तार नेतृत्वको सैनिक सरकारका फौज र अन्तर्राष्ट्रिय मान्यताप्राप्त सरकारप्रति वफादार सेनाबीच राजधानी त्रिपोली वरपर रहेको क्षेत्रमा भिडन्त भएको अन्तर्राष्ट्रिय सञ्चारमाध्यमले जनाएका छन् । भिडन्तमा ४६ जना माएिका छन् ।

भिडन्तका क्रममा अन्तर्राष्ट्रिय मान्यताप्राप्त सरकारप्रति वफादार सेनातर्फ ३२ जनाको ज्यान गएको छ भने हफ्तार नेतृत्वको सरकारप्रति वफादार सेनातर्फ १४ सैनिकको ज्यान गएको बताइएको छ । आक्रमणमा अरु दर्जनौँ घाइते भएका छन् ।

पछिल्लो समय हफ्तार नेतृत्वको सरकारले पूरै लिबियाली भूभागमा आफ्नो नियन्त्रण स्थापना गर्ने उद्देश्यले अघि बढिरहेको छ । निकै सानो भू–भागमा मात्र आफ्नो प्रशासन चलाउने क्षमता रहेको अन्तर्राष्ट्रिय मान्यता प्राप्त लिबियाली सरकार भने हफ्तारको आक्रमणको प्रतिकार गर्न निरिह रहेको भन्ने आलोचना समेत शुरु भएको बताइएको छ ।

यस्तो अवस्थामा धेरैवटा गुट उपगुटमा विभाजित त्रिपोलीका लडाकुलाई फकाउने र आफ्नो पक्षमा परी हफ्तार नेतृत्वको फौजले त्रिपोलीमा आफ्नो पकड अझ मजबुत बनाउन खोजिरहेको बताइन्छ ।

अन्तर्राष्ट्रिय रुपमा सघन कुटनीतिक कदमहरु चालिएपनि पछिल्लो समय लिबियामा भिडन्तहरु भइरहेको अन्तर्राष्ट्रिय सञ्चारमाध्यमले जनाएका छन् । हालै संयुक्त राष्ट्रसंघका महानसचिव एन्टोनियो गुटरेजले लिबियाको भ्रमण गरी दुबै पक्षलाई हिंसा अन्त्य गर्न आह्वान गरेका थिए ।

तत्कालीन लिबियाली शासक मोअम्मर गद्धाफीको शासन पतन भएपछि राजनीतिक तथा क्षेत्रीय प्रभावका विषयलाई लिएर लिबियामा विभिन्न समूह, गुट र उपगुटबीच भिडन्त हुँदै आएको छ ।