दाङ- प्रदेश नं ५ का मुख्यमन्त्री शङ्कर पोखरेलले पछिल्लो समय मुलुकमा विकासले गति लिएको बताएका छन् ।

दाङको घोराहीमा दाङ क्षेत्र नं ३ को प्रदेशसभा ‘ख’ का लागि उम्मेदवारी दर्तापछि आयोजित सभालाई सम्बोधन गर्दै उनले जिल्लामा तीनवटै सरकारले विकास निर्माणको गतिलाई अघि बढाएको बताए ।

नेपाल कम्युनिष्ट पार्टी (नेकपा) का प्रदेश नं ५ इञ्चार्जसमेत रहेका मुख्यमन्त्री पोखरेलले जिल्लामा पछिल्लो समय दर्जनौँ पुल निर्माण पूरा भएका र सडक कालोपत्र गर्ने कार्यले तीव्रता लिएको बताए ।

स्व उत्तरकुमार वलीको सपना पूरा गर्न उनकी धर्मपत्नी विमलाकुमारी खत्री वलीलाई उमेदवार बनाइएको उनले बताए । सभामा उम्मेदवार विमलाले पार्टीले गरेको विश्वास र दिएको जिम्मेवारीलाई श्रीमान्को सपना पूरा गर्ने अवसरका रुपमा लिएको बताए ।