नयाँ दिल्ली– मंगलबार अबेर निधन भएकी भारतीय पूर्व विदेशमन्त्री सुष्मा स्वराजको बुधबार राष्ट्रिय सम्मानका साथ अन्त्येष्टी गरिएको छ ।
नयाँ दिल्लीको लोधी रोडमा उनको अन्त्येष्टी समारोहमा सयौंको उपस्थिती थियो । प्रधानमन्त्री नरेन्द्र मोदीसहित सत्तारुढ भारतीय जनता पार्टीका प्रमुख नेताहरु लालकृष्ण आडवाणी, अमि शाहलगायतले उनलाई अन्तिम श्रद्धाञ्जली दिएका थिए ।

उनको शवमा राष्ट्रिय झण्डा ओढाइएको थियो भने उनको अन्त्येष्टीमा २१ तोपको सलामी दिइएको थियो । एक्कासी हृदयघात भएपछि उनलाई एम्स अस्पतालमा भर्ना गरिएकी उनको मंगलबार अबेर निधन भएको थियो । उनको निधनप्रति भारतीय राजनीतिज्ञ तथा अन्य मुलुकका नेताहरुले समेत शोक व्यक्त गरेका थिए ।

प्रधानमन्त्री नरेन्द्र मोदीको पहिलो कार्यकालमा उनले सन् २०१४ देखि २०१९ सम्म भारतको विदेशमन्त्रीको जिम्मेवारी सम्हालेकी थिइन् । यसअघि उनले सन् २००९ देखि २०१४ सम्म संसद्मा विपक्षी दलको नेताको रुपमा जिम्मेवारी सम्हालेकी थिइन् ।

सन् २०१६ मा मिर्गौला प्रत्यारोपण गरेकी उनले यसैवर्ष भएको आम निर्वाचनमा भने स्वास्थ्यका कारण उम्मेद्वारी दिएकी थिइनन् । स्वराजका पतिसहित एक छोरी छिन् ।