काठमाडौं– लामो प्रयासपछि सरकारले एकै पटकमा धेरै स्मार्ट कार्ड छाप्ने क्षमता भएको ‘मास प्रिन्टर’ भित्र्याएको छ । चार वर्षअघिदेखि स्मार्ट सवारी चालक अनुमतिपत्र वितरण थालिएकोमा मास प्रिन्टर नहुँदा अझै १० लाख स्मार्ट कार्ड छाप्न बाँकी छ ।

यातायात व्यवस्था विभागसँग अहिले भएको उपकरणले एकै पटकमा धेरै स्मार्ट कार्ड नछाप्ने भएकाले सेवाग्राहीले करिब एक वर्षसम्म कुर्नु पर्ने बाध्यता छ । यो बाध्यतालाई अन्त्य गर्न ल्याइएको मास प्रिन्टर आज विभाग कार्यालय आइपुगेको हो ।

एकडेढ महिनापछि उक्त उपकरण प्रयोगमा आउने विभागका प्रवक्ता तीर्थराज खनालले बताए । उपकरण आएपछि त्यसको जडान, परीक्षणलगायतका काम सकिएपछि नियमित रुपमा सञ्चालनमा आउने उनले बताए । विभागले मदरास प्रिन्टर प्रालिमार्फत प्रिन्टर खरीद गरेको हो ।

‘स्मार्ट’ चालक अनुमतिपत्र वितरणमा रहेको ढिलाइ हटाउनका लागि ‘मास प्रिन्टर’ खरीद गरिएको उनले बताए । प्रवक्ता खनालले भने, ‘प्रिन्टरले नियमित रुपमा काम गर्न शुरु गरेपछि अहिले रहेको समस्या समाधान हुनेछ ।’

सरकारले गतवर्ष ग्लोबल बोलपत्रमार्फत प्रिन्टर खरीद प्रक्रिया अघि बढाएको थियो । प्रिन्टर खरीदका लागि तोकिएको अवधि गत महिनामा नै सकिएको थियो । तोकिएको अवधिमा प्रिन्टर नआएपछि ठेकेदार कम्पनीलाई नियमित रुपमा घचघचाइरहेको विभागले जनाएको छ ।

विभागमा रहेको मुद्रणयन्त्र (छपाइ मेसिन) को क्षमताभन्दा धेरै कार्ड छाप्नुपर्ने भएकाले सेवाग्राहीले समयमा चालक अनुमतिपत्र नपाएको विभागले जनाएको छ । विभागमा अहिले नौ वटा उपकरण रहेका छन् ।

तीमध्ये छ/सात वटाले मात्रै नियमित काम गरिरहेको प्रवक्ता खनालले बताए । विभागले नयाँ वा नवीकरणका लागि परेका आवेदनबाट एक वर्ष वा त्योभन्दा पहिलेदेखिको कार्ड छाप्न बाँकी छ ।

देशभरका सबै यातायात व्यवस्था कार्यालयबाट परीक्षा उत्तीर्ण गरेकाको चालक अनुमतिपत्र छपाइ यातायात व्यवस्था विभागले गर्दै आएको छ ।