काठमाडौं– ओखलढुंगाको चम्पादेवी गाउँपालिका, पलापुमा बस्ती छिरेर बाघले बितण्डा मच्चाउँदा एक व्यक्ति घाइते भएका छन् भने २७ वटा बाख्रा मारिएका छन् ।

चम्पादेवी गाउँपालिका– १ र २ मा पर्ने पलापुमा तीन दिनमा बाघले २७ वटा बाख्रा मारेको हो । बुधबार बिहान स्थानीय मसली मायाको नौ वटा खसीबोकासहित नौ वटा बाख्रा मारेको छ । यसअघि मंगलबार पलापुकै झलकबहादुर मगरको र बाबुराम श्रेष्ठको बाख्रा मारेको थियो ।

तीन दिनअघि स्थानीय बलबहादुर श्रेष्ठ, घनीमाया मगर, मेघबहादुर श्रेष्ठ, एकबहादुर श्रेष्ठ र असमन मगरको एक–एक वटा बाख्रा बाघले मारेको वडाध्यक्ष कुलबहादुर श्रेष्ठले जानकारी दिए ।

केही दिनयता बाघले गाउँमा आतङ्क मच्चाएको श्रेष्ठको भनाइ छ । बाघको आक्रमणबाट पलापुका हीराबहादुर श्रेष्ठ घाइते भएका छन् । गोठमा काम गरिरहेको अवस्थामा श्रेष्ठलाई बाघले आक्रमण गरेर घाइते बनाएको हो । घाइते श्रेष्ठको सिन्धुलीको खुर्कोटमा उपचार भइरहेको छ ।

बाघ नियन्त्रणका लागि जिल्ला प्रशासन कार्यालय र डिभिजन वन कार्यालय ओखलढुङ्गामा पहल गरिएको गाउँपालिका प्रमुख नवराज केसीले बताए । बाघ नियन्त्रणका लागि जिल्लाबाट टोली मगाइएको अध्यक्ष केसीले जानकारी दिए।

रातदिन जुनसुकै समयमा बाघले आक्रमण गरी बाख्रा मार्न थाले पछि स्थानीयवासी त्रसित भएका छन् । डिभिजन वन कार्यालय ओखलढुङ्गाका फरेष्टर गणेशबहादुर कटुवालका अनुसार बाख्रामाथि भएको आक्रमणका प्रकृतिअनुसार बाघले नै स्थानीयलाई त्रसित परेको हुन सक्ने बताए ।

गाउँ छिरेको बाघले केहि दिनदेखि गोठमा पसेर बस्तुभाउलाई आक्रमण गर्न थालेपछि स्थानीय त्रसित बनेका छन् । बाघले बितन्डा मच्चाउन थालेपछि घर बाहिर हिँड्डुल गर्न पनि समस्या भएको स्थानीय खिम श्रेष्ठले बताए ।

बाघले आक्रमण गर्ने त्रास बढेसँगै स्थानीयबासी खेतिपाती तथा घरायसी कामका लागि बाहिर निस्कन सकिरहेका छैनन् । सामान्यत: पहाडी जिल्लामा बाघ बिरलै पाइन्छ ।