टेगुसिगाल्पा– ल्याटिन अमेरिकी मुलुक होण्डुरसमा लागूपदार्थ समूहसँग राष्ट्रपति हुआँ ओर्लाण्डो हर्नाण्डेजको नाम जोडिएपछि उनीविरुद्ध राजधानी टेगुसिगाल्पामा दशौं हजारले प्रदर्शन गरेका छन् ।

सन् २०१३ मा भएको निर्वाचनमा शक्तिशाली लागूपदार्थ तस्कर समूहसँग पैसा लिएको खुलासा भएपछि उनीविरुद्ध व्यापक जनआक्रोश पैदा भएको छ । केही दिनअघि मात्र उनले लागूपदार्थ समूहसँग पैसा लिएको अस्वीकार गर्न बाध्य भएका थिए ।

राष्ट्रपतिविरुद्धको प्रदर्शन हिंसात्मक भएको तथा ठाउँठाउँमा प्रदर्शनकारी र प्रहरीबीच झडप भएको अन्तर्राष्ट्रिय सञ्चारमाध्यमले जनाएका छन् । प्रदर्शनकारीलाई तितरबितर पार्न प्रहरीले अश्रुग्यास र पानीका फोहोरा प्रहार गरेका थिए । जवाफमा प्रदर्शनकारीले ठाउँठाउँमा आगजनी गरेको र प्रहरीमाथि ढुङ्गामुढा प्रहार गरेको बताइएको छ ।

गत सातामात्र अमेरिकाको एक अदालतले सार्वजनिक गरेको दस्तावेजमा राष्ट्रपति हुआँ ओर्लाण्डो हर्नाण्डेजले सन् २०१३ मा भएको निर्वाचनका लागि लागूपदार्थ समूहबाट १५ लाख अमेरिकी डलरभन्दा धेरै चन्दा लिएको खुलासा गरेको थियो ।

उनले भने आफू यस्तो गतिविधिमा संलग्न नरहेको र लागूपदार्थ समूहविरुद्ध आफ्नो प्रशासनले चालेको कदमबाट आक्रोशित समूहले आफूविरुद्ध षड्यन्त्र गरेको उनको भनाइ छ ।

गत नोभेम्बर महिनामा उनका भाइ टोनीलाई अमेरिकाको फ्लोरिडा राज्यस्थित मियामी शहरमा पक्राउ गरिएको थियो । त्यसयता उनलाई राजीनामा दिन तीब्र दबाब रहेको अन्तर्राष्ट्रिय सञ्चारमाध्यमले जनाएका छन् ।