काठमाडौं– प्रहरीले एक नेपालीको हत्या गर्न भारतीय नागरिकबाट परिचालित तीन जनालाई पक्राउ गरेको छ ।

विराटनगर ८ मा बस्दै आएका जितेन्द्र रायको हत्या गर्न भारतीयबाट परिचालित भएका सर्लाहीका हरिनारायण झा र भारत सीतामढी बस्ने राकेश झा र अर्का एक जनालाई प्रहरीले पक्राउ गरेको हो।

उनीहरु तीन महिनादेखि रायको हत्याका लागि परिचालित भएको प्रहरी अनुसन्धानबाट खुलेको छ । मोरङका डीएसपी राजकुमार खिउजुका अनुसार रायलाई मार्ने उद्देश्यले नेपाल आएका भारतीय नागरिक कुनाल कुमारलाई गत जेठ २७ मा दुई थान स्वचालित पेस्तोलसहित पक्राउ गरिएको थियो।

सो क्रममा चार थान म्यागजिन र आठ राउन्ड गोली समेत प्रहरीले बरामद गरेको थियो । उनीहरुले नै रायको हत्या गर्ने योजनाअनुसार हरिनारायण झा र राकेश झालाई परिचालन गरेको डीएसपी खिउजुले बताए। पक्राउ परेका तीनैजनाविरुद्ध हातहतियार तथा खर खजाना ऐन तथा संगठित अपराध ऐनअन्तर्गत मुद्दा चलाइने भएको छ ।