काठमाडौं- श्रम, रोजगार तथा सामाजिक सुरक्षा मन्त्रालयले नेपालकी कामदार टर्कीमा पठाउने विषयमा छलफल थालेको छ। नेपालबाट कामदार लैजान टर्की इच्छुक भएपछि मन्त्रालयले छलफल र श्रम समझदारीको मस्यौदा आदान प्रदान गर्ने प्रक्रिया अघि बढाएको हो ।

गत जेठको अन्तिम साता जेनेभामा भएको दुई देशबीचको श्रम मन्त्रालयस्तरीय बैठकमा टर्कीले नेपाली कामदार लैजाने प्रस्ताव गरेको थियो । सोही अनुसार छलफल र श्रम समझदारीको मस्यौदा आदान प्रदान प्रक्रियाको काम भइरहेको मन्त्रालयले जानकारी दिएको छ ।

विभिन्न क्षत्रेमा आवश्यक कामदार नेपालबाट लिने प्रस्ताव टर्कीले प्रस्ताव गरेको थियो । त्यसै अनुरुप टर्कीलाई श्रम समझदारीको मस्यौदा पठाउन अन्तिम तयारी भइरहेको मन्त्रालयले जनाएको छ ।

टर्कीमा संस्थागत रुपमा वैदेशिक रोजगारी खुला गर्न दुवै देशले श्रम समझदारीका लागि वार्ता अघि बढाउन लागेको मन्त्रालयले जनाएको छ । हाल व्यक्तिगत रुपमा नेपाली कामदार टर्की गइरहेका छन् ।

दई देश कामदार आपूर्तिका लागि छलफल गरेर श्रम समझदारी (एमओयू) हुने मन्त्रालयले जनाएको छ ।