हङकङ– विवदास्पद सुपुर्दगी विधेयकको विरोधमा दशौं हजारले हङकङस्थित तीब्र गतिको चिनियाँ रेल सेवामा प्रदर्शन गरेका छन् ।

मुख्यभूमि चीनबाट आएका पर्यटकलाई विवदास्पद सुपुर्दगी विधेयकबारे जानकारी गराउनका लागि हङकङको पश्चिम क्वालुनस्थित रेल सेवालाई लक्षित गरी दशौं हजारले प्रदर्शन गरेका हुन् ।

प्रदर्शनका कारण रेल सेवा अस्तव्यस्त बनेको हङकङको अनलाइन समाचार पोर्टल हङकङ फ्रि प्रेसले लेखेको छ । चीनको समाचार संस्था तथा टेलिभिजनहरुले हङकङमा भएको प्रदर्शनलाई प्रकाशन तथा प्रसारण नगर्ने गरेको बताइन्छ । त्यस्तै, सामाजिक सञ्जालमा पनि प्रदर्शनबारेका सामग्री हटाइने गरिएको छ ।

प्रदर्शनकारीले मुख्यभूमि चीनबाट आउने पर्यटकका लागि प्रख्यात पर्यटकीय केन्द्रमा समेत प्रदर्शन गरेका छन् । प्रदर्शनलाई मध्यनजर गर्दै १ हजारभन्दा धेरै प्रहरी परिचालन गरिएको छ भने प्रदर्शन शान्तिपूर्ण रहेको बताइएको छ ।

पछिल्ला केही सातायता हङकङमा उक्त सुपुर्दगी विधेयकलाई लिएर प्रदर्शन हुँदै आएको छ । हङकङकी प्रमुख कार्यकारी क्यारी लामले उक्त विधेयक अनिश्चितकालसम्मका लागि स्थगित गरिएको घोषणा गरेपनि प्रदर्शनकारीले भने विधेयक पूर्ण रुपमा फिर्ता लिइनुपर्ने तथा क्यारी लामले पदबाट राजीनामा दिनुपर्ने अडान लिँदै आएका छन् ।

अघिल्लो सातामात्र हङकङमा भएको प्रदर्शनका क्रममा प्रदर्शनकारीले त्यहाँको व्यवस्थापकीय परिषद्को भवनमा तोडफोड गरेका थिए ।
विवदास्पद सुपुर्दगी कानून लागू भएमा हङकङमा बसिरहेका मानिसहरुलाई मुख्यभूमी चीनमा सुपुर्दगी हुनसक्ने र त्यसबाट उनीहरुको मानवअधिकार हनन् हुने तथा हङकङको साख घट्ने प्रदर्शनकारीको भनाइ छ ।