एजेन्सी– इटालीका उपप्रधानमन्त्रीले फ्रान्समा विरोध प्रदर्शन गर्दै आएका येल्लो भेष्ट अभियानका अभियन्तालाई भेटपछि फ्रान्सले इटालीबाट आफ्ना राजदूत फिर्ता बोलाएको छ ।

इटालीका संस्थापनविरोधी अभियान फइभ स्टार मुभमेन्टका नेता तथा उपप्रधानमन्त्री लुइजी डि माइयोले येल्लो भेष्ट अभियानका नेतासँग भेट वार्ता गरेको तस्बीर ट्विट गरेका थिए । ट्विटमा उनले ‘‘आल्प्स पर्वतभर परिवर्तनको वायु’’ भन्ने सन्देश लेखेका थिए ।

त्यसलगत्तै फ्रान्सले इटालीका उपप्रधानमन्त्रीको यस्तो कदमप्रति विरोध जनाएको थियो ।

फ्रान्सेली विदेशमन्त्रालयले विज्ञप्ति जारी गर्दै इटालीबाट भएको यस्तो उत्तेजक कदमको विरोध गर्दै रोममा रहेका आफ्ना राजदूतलाई फिर्ता बोलाउने जनाएको छ ।
फ्रान्समा येल्लो भेष्ट अभियानले राष्ट्रपति इम्मानुएल म्यक्रोंको राजीनामाको माग गर्र्दै विगत तीन महिनायता प्रदर्शन गर्दै आएको छ ।