काठमाडौं– ‘नथिया’ उपन्यासकी लेखिका सरस्वती प्रतीक्षाविरुद्ध चरित्रहत्या गरेको दाबी सहित महानगरीय प्रहरी परिसर काठमाडौँमा उजुरी परेको छ ।
घोराही उपमहानगरपालिका बस्ने रञ्जिता नेपालीले सरस्वतीले लेखेको ‘नथिया’ उपन्यासमा वादी समुदायको आत्मसम्मानमा ठोस पुग्ने शब्दहरू प्रयोग गरेर चरित्र हत्या गरेको भन्दै क्षतिपूर्तिसहित प्रहरीमा उजुरी दिएकी हुन् ।
रञ्जिताले प्रहरीमा दर्ता गरेको उजुरीमा सरस्वतीले नेपाल सरकारबाट बन्देज गरेका समग्र समुदायलाई प्रत्यक्ष ठेस लाग्ने, लान्छना, भेदभाव देखिने शब्दहरूको प्रयोग भएको र समग्र समुदायलाई प्रतिकूल असर हुने खालका शब्दहरू जस्तै बदेनि, रण्डी, वेश्या, रखेल शब्दहरू तथा प्रतिकृयाहरु उपन्यासमा प्रयोग भएको उल्लेख छ ।
प्रहरीमा परेको उजुरीमा उपन्यासको ‘नथिया’ शीर्षक नै गलत अर्थ लगाई परिभाषित गरेको समेत उल्लेख छ । यतिमात्र होइन, उपन्यासमा मन्जुरीविना स्वर्गीय बुबा गुमानसिंह र आफ्नो नाम उल्लेख गरेर चरित्र हत्या गरेको आरोप समेत लगाइएको छ ।