इटहरी– राष्ट्रपति विद्यादेवी भण्डारीले विद्धान विद्युषीहरुको पवित्र तपोभूमि धार्मिक तथा साँस्कृतिक पक्षको विकास र जगेर्नामा जोड दिनुपर्ने बताएकी छिन् ।

सुनसरीको इटहरीमा नवनिर्मित कलात्मक श्रीकृष्ण प्रणामी मन्दिर मुक्तिधामको आइतबार उद्घाटन गर्दै राष्ट्रपति भण्डारीले विशेष पूजाअर्चना समेत गरिन् । उद्घाटन समारोहलाई सम्बोधन गर्दै राष्ट्रपति भण्डारीले विराटक्षेत्रमा अवस्थित मन्दिरले नेपालकै धार्मिक महत्व बढाएको बताइन् ।

उनले देशकै महत्वपूर्ण धार्मिक पर्यटकीय गन्तव्यको रुपमा विकसित हुने सम्भावना बोकेको यो क्षेत्रमा सुविधायुक्त सार्वजनिक यातायात, पर्यटकीय सुविधाका अन्य पूर्वाधारहरुको विकासमा पनि ध्यान दिन आग्रह गरेकी थिइन् ।

करिव ७ करोडको लागतमा मन्दिर निर्माण गरिएको हो । विभिन्न दाताबाट प्राप्त सहयोग तथा चन्दा संकलन गरी मन्दिर निर्माण गरिएको वृहत्तर मुक्तिधाम विकास समितीका अध्यक्ष हेम घिमिरेले जानकारी दिए ।

मन्दिर उद्घाटन समारोहमा मुख्यमन्त्रि शेरधन राई, प्रदेश प्रमुख गोविन्द तुम्बाहागं, महिला बालबालिका मन्त्रि थममाया थापा मगर, संघीय मामिला तथा सामान्य प्रशासन मन्त्रि लालवाबु पण्डित लगायतले आ–आफ्ना धारणा राखेका थिए ।