काठमाडौं – कथाकार जिके पोख्रेलको कथा सङ्ग्रह ‘गोहो’ को विमोचन गरिएको छ । काठमाडौंको अनामनगरस्थित सर्वनाम थियटरमा शनिबार सम्पन्न विमोचन कार्यक्रममा समीक्षकद्वय महेश पौड्याल, राजिन पनेरु र कथाकार पोख्रेलले संयुक्त रुपमा पुस्तक विमोचन गरे ।

नेपालको दशवर्षे जनयुद्धले सामाजिक र राजनैतिक रुपमा पारेको प्रभावलाई कथाकारले आफ्ना कथामा उतारेका छन् । विमोचन कार्यक्रममा बोल्दै समीक्षक महेश पौड्यालले पोख्रेलका कथा राजनैतिक र सामाजिक विषयवस्तुमा आधारित हुँदाहुँदै पनि तटस्थ रहेको बताए ।

जनयुद्धको कथालाई जिकेले झण्डै एक दशकपछि लेखेकाले यो सम्भव भएको पौड्यालको भनाइ थियो ।

कार्यक्रममा अर्का समालोचक राजिन पनेरु पोख्रेलका पुस्तकले नेपाली समाजको निकट विगतको ठूलो सकसको कथा बोकेको धारणा राखे ।

पोख्रेलका यसअघि दुईवटा कथा संग्रह ‘जून निदाएको रात’ र ‘स्वाभिमानको चिता’ सार्वजनिक भइसकेका छन् । ‘गोहो’ दशवटा कथा समावेश छन् भने यो कृतिलाई अक्षर~शालाले बजारमा ल्याएको हो ।