काठमाडौं– आज प्रकाशित कान्तिपुर दैनिकले बारा पर्सा हावाहुरी पीडतको समस्यालाई मुख्य समाचार बनाएको छ । चटपटेको भरमा हुरीपिडित, कागमा समेत बर्डफ्लु शीर्षकको समाचार कान्तिपुरले पहिलो पृष्ठमा प्रकाशन गरेको छ । त्यस्तै भागबन्डा मिल्यो नाम टुंगिन बाँकी शीर्षको समाचार कान्तिपुरले छापेको छ ।

कान्तिपुरले मानव तस्करीको आरोप लागेपछि राजीनामा दिएकी अस्ट्रेलियाका लागि पूर्वराजदूत लक्की शेर्पाले कूटनीतिक उच्च तहमा उब्जिएको गम्भीर मामलामा परराष्ट्र मन्त्रालयले एकपक्षीय र प्रयोजित मनसाय राखेर मौनता साधेको ओरोप लगाएको समाचार परराष्ट्रले बोल्नै दिएन शीर्षकमा प्रकाशन भएको छ ।

कान्तिपुरले मुख्य समाचार बनाएको चटपटेको भरमा हुरीपीडित शीर्षकको समाचारमा लेखिएको छ– फेटा गाउँपालिका–६ पुरैनियामा शनिबार अपराह्न २ बजे पुग्दा ४२ वर्षीया सल्या खातुन प्लास्टिकको जगमा भुजामा तेल र नुन मिसाएर बनाइएको चटपटे खाँदै थिइन् ।

गत आइतबारको हावाहुरीले घर ध्वस्त बनाएपछि सेनाले निर्माण गरेको टेन्टमा बस्दै आएकी उनले विहानको खान अबेरसम्म खान नपाएपछि भोक मार्न चटपटे खाएको बताइन् ।

भुजा र चिउरा चपाउँदा चपाउँदा मुख दुखिसक्यो उनले भनिन् । शुक्रवार साँझसम्म चलेको मेस शनिबारदेखि बन्द छ । टेन्टमा चामल र दालका बोरा छन् तर पाकाउने भाँडो र चुलो छैन । उनले पकाउने सामान हावाहुरी उडाएको बताइन् । राहतको रुपमा आएको भाँडामा प्लास्टिकका जग र बाल्टिन मात्र पाएको उनको भनाइ छ ।