अमेरिका– चीनको प्राविधिक उपकरण निर्माता तथा दूरसञ्चार सेवा प्रदायक कम्पनी हुवावेले आफ्ना उत्पादन अमेरिकामा बेच्न सिमित पार्ने अमेरिकी कानून असंवैधानिक रहेको भन्दै खारेज गर्न माग गरेको छ ।

हुवावेले अमेरिकाको टेक्सास राज्यको प्लानो जिल्लामा रहेको जिल्ला अदालतमा अमेरिकाको नेशन डिफेन्स अथोराइजेशन एक्टको धारा ८८९ विरुद्ध मुद्दा दायर गरेको हो ।

गत अगष्ट महिनामा राष्ट्रपति डोनाल्ड ट्रम्पले हस्ताक्षार गरी कानूनी मान्यता दिएको यस धारा अनुसार अमेरिकी संघीय निकाय तथा संघीय निकायका ठेकेदारहरुले हुवावेका उपकरण प्रयोग गर्न तथा सेवा लिन नपाउने प्रावधान छ ।

अदालतमा मुद्दा दायर गर्ने हुवावेको कदमलाई चीन र अमेरिकाबीच व्यापारिक खिचातानीको पछिल्लो घटनाका रुपमा लिइएको छ ।क्यानाडामा पक्राउ परेकी हुवावेकी प्रमुख वित्तीय अधिकारी मेङ वान्झोउलाई क्यानाडाले अमेरिका सुपुर्दगी गर्ने प्रक्रिया शुरु गरेपछि चीन र अमेरिकाबीच कुटनीतिक तनाव पनि बढेको बताइन्छ ।

त्यसबाहेक अमेरिकाले चीनबाट आयात हुने सामानमा भन्सार महशुल बढाउने तर्फ पनि ध्यान दिइरहेको अमेरिकी सञ्चार माध्यमले जनाएका हुन् । चीन सरकारका लागि अमेरिकामा आफ्ना उपकरणमार्फत् हुवावेले जासुसी गरिरहेको अमेरिकाले बताउने गरेको छ । तर, हुवावेले भने आफूले त्यस्तो केही गरिरहेको भन्ने आरोप अस्वीकार गर्दै आएको छ ।