थाइल्याण्ड- राजकुमारीलाई चुनावमा उम्मेदवार उठाउने घोषणा गरेको थाइल्याण्डको ‘थाई रक्षा चार्त पार्टी’लाई संवैधानिक अदालतले खारेज गरेको छ । थाई राजा महावजिरलङ्कोर्णकी दिदी उबोलरत्न राजकन्या सिरिवन्दना वर्नावदीलाई आगामी मार्च २४ मा हुन लागेको आम निर्वाचनमा उम्मेद्वार बनाउने घोषणा गरेको थाई रक्षा चार्त पार्टीलाई संवैधानिक अदालतले खारेज गरेको हो ।

अदालतले पार्टीलाई खारेज गरेको तथा पार्टीको कार्यकारी समितिका पदाधिकारीलाई १० वर्षसम्म राजनीतिमा प्रवेश नदिनेगरी फैसला सुनाएको हो । थाई रक्षा चार्त पार्टीले राजकुमारी उबोलरत्नलाई प्रधानमन्त्रीको उम्मेद्वार बनाएपछि थाइल्याण्डको निर्वाचन आयोगले पार्टीको यो कदम मुलुकको संवैधानिक राजतन्त्रको प्रतिकूल रहेको भन्दै संवैधानिक अदालतमा उजुरी दिएको थियो ।

६७ वर्षीया राजकुमारी उबोलरत्नले सन् १९७२ मा आफ्नो राजकीय पद त्यागेपनि उनलाई थाइल्याण्डमा अझै पनि राजकुमारीजस्तै व्यवहार गरिने बताइएको छ । राजा महा वजिरलङ्कोर्णले पनि राजकुमारी उबोलरत्नको उम्मेद्वारीको चर्को विरोध गरेका थिए ।

चुनाव आउन दुई साताअघि संवैधानिक अदालतले यो फैसलालाई निकै महत्वका साथ हेरिएको अन्तर्राष्ट्रिय सञ्चारमाध्यमले जनाएका छन् । थाई रक्षा चार्त पार्टीलाई थाइल्याण्डको वर्तमान संस्थापन विरोधी तथा पूर्व प्रधानमन्त्री थाक्सिन सिनावात्रा प्रति वफादार पार्टी मानिन्छ ।

सन् २०१४ मा सेनाले तत्कालिन प्रधानमन्त्री यिङ्लक सिनावात्रालाई पदच्युत गरी शासन आफ्नो हातमा लिएपछि थाइल्याण्डमा हुन लागेको यो पहिलो आम चुनाव हो ।