काठमाडौं– माल्दिभ्सलाई हराउँदै १३ औँ दक्षिण एशियाली खेलकुद अन्तर्गतको पुरुष फुटबलमा नेपाल स्वर्ण पदकका लागि फाइनलमा पुग्ने सम्भावना बलियो बनेको छ ।

शनिवार दशरथ रङ्गशालामा भएको खेलमा नेपालले माल्दिभ्सलाई २-१ गोलले पराजित गरेको थियो । गत दक्षिण एशियाली खेलकुदको स्वर्ण पदक विजेता नेपालको यो तीन खेलमा दोस्रो जित हो ।

यो नतिजापछि नेपाल सात अङ्कका साथ अङ्क तालिकाको शीर्ष स्थानमा रहेको छ। लिगको समाप्तिमा शीर्ष स्थानमा रहने दुई देशले स्वर्ण पदकका लागि प्रतिस्पर्धा गर्नेछन् ।

शनिवार माल्दिभ्सले १८औँ मिनेटमा गोल गरेर अग्रता लिएको थियो । अभिषेक रिजालले ४३औँ मिनेटमा गोल गरेर बराबरी गरे भने अनन्त तामाङले ५१औँ मिनेटमा गोल गरेर नेपाललाई अग्रता दिलाएका हुन् ।

शनिवार बेलुका श्रीलङ्का र भुटानबीच खेल हुँदैछ । सो खेलमा भुटान पराजित भए नेपाल फाइनलका लागि छनौट हुनेछ । अन्तिम लिग खेल आइतवार नेपाल र बाङ्ग्लादेशबीच हुनेछ ।