एजेन्सी– अमेरिका–तालिबान वार्ताको तयारी गरिएको छ ।

कतारको राजधानी दोहामा अचानक वार्ताको तयारी गरिएको अन्तर्राष्ट्रिय सञ्चारमाध्यमहरुले जनाएका छन् । अमेरिकी राष्ट्रपति डोनल्ड ट्रम्पले अचानक कुटनीतिक पहल गरेपछि वार्ता सम्भव भएको द सनले उल्लेख गरेको छ ।

गत साता मात्रै ट्रम्प अफगानिस्तान भ्रमणमा जाँदा तालिबान सम्झौताका लागि तयार रहेको प्रतिक्रिया दिएका थिए । दोहामा शनिबार अमेरिकाले वार्ताको आयोजना गरेको सीएनएनले जनाएको छ ।

तीन महिनाअघि मात्रै अमेरिका र तालिबानबीच वार्ता अवरुद्ध भएको थियो । वार्ता प्रक्रिया चलिरहँदा तालिबानले गत सेप्टेम्बरमा श्रृंखलावद्ध हमला गरेपछि अमेरिकी तर्फबाट वार्ता रोकिएको थियो ।

शनिबार दोहामा हुने वार्ता अफगानिस्तानमा तालिबानले हिंसा अन्त्य गर्नुपर्ने तथा युद्धविराम गर्नुपर्ने विषयमा केन्द्रित हुने बताइएको छ । गत सेप्टेम्बरमा अमेरिकाले अफगानिस्तानबाट सेना फिर्ता गर्ने र तालिबानले युद्धविराम गर्ने विषयमा अमेरिका र तालिबानबीच सम्झौता भएको थियो ।