काठमाडौं– नेपाली राष्ट्रिय फुटबल टोलीले कुवेत र मलेसियाको राष्ट्रिय टोलीसँग मैत्रीपूर्ण खेल खेल्ने अखिल नेपाल फुटबल संघ (एन्फा) ले जानकारी दिएको छ ।

नेपालले कुवेत र महिलेसियासँग मार्च महिनाभित्रै पाँच दिनको अन्तरमा मैत्रीपूर्ण खेल खेल्नेछ । मैत्रीपूर्ण खेल कुवेतसँग मार्च २१ र मलेसियासँग २६ मार्चमा हुनेछ । नेपाली टोली खेलका लागि कुवेत र मलेसिया पुग्नेछ ।

योसँगै नेपाल कुवेत र मलेसियाविरुद्ध क्रमश पाँच र सातौं पटक मैदान उत्रिदै छ ।

केही दिन अगाडि मात्रै नेपाली राष्ट्रिय टोलीको मुख्य प्रशिक्षकमा नियुक्त भएका योहान कालिनले छिट्टै मैत्रीपूर्ण खेलका लागि टोलीको घोषणा गर्ने बताएका छन् ।

“यो मेरो पहिलो काम हो । हाम्रा लागि यी दुई खेल महत्वपूर्ण छन्, खासगरि मेरा लागि र टिमका लागि पनि । यु—२३ को टिम थाइल्यान्डमा हुने एएफसी यु—२३ च्याम्पियनसिप छनोटका लागि अभ्यासमा व्यस्त छ । त्यसका केही नयाँ अनुहार मेरो टिममा पनि पर्नेछन्,” कालिनले भने, “यो हाम्रा लागि परीक्षण पनि हो । हामी दुवै खेलमा राम्रो खेल्न चाहान्छौं ।”