काठमाडौं– प्रमुख प्रतिपक्षी दल नेपाली कांग्रेसकी सांसद पुष्पा भुसालले तराई मधेसबाट नेपाली कांग्रेस र कांग्रेसका नेताको नाम मेटाउन षड्यन्त्र भइरहेको आरोप लगाएकी छिन् ।

बिहीवार प्रतिनिधिसभा बैठकमा बोल्दै कांग्रेस सांसद भुसालले यसअघि वीपी उद्यान बनाउनका लागि छुट्याइएको जग्गामा अहिले दुई नम्बर प्रदेश सरकारले शहीद पार्क उद्घाटन गरेको भन्दै आपत्ति जनाएकी छिन् ।

‘वीपी जस्तो राजनेता कांग्रेसको मात्र नेता होइन जनताको पक्षमा लडेको नेताको इतिहास मेटाउनका लागि तराई, मधेसबाट कांग्रेस र कांग्रेसका नेताको नाम निशान हटाउन जुन कदम चालिएको छ यसको घोर भत्सना गछौं’ भुसालले भनिन् ।

उनले सभामुख मार्फत प्रदेश सरकारलाई निर्देशन दिनका लागि आग्रह गरिन् ।

‘कानूनी र राजनीतिक हैसित हटाउने अन्यायपूर्ण काम भयो’ भुसालले भनिन्,‘इतिहास मेटाउने काम भयो भने शसक्त विरोधमा उत्रने चेतावनी दिन्छौं । तसर्थ तुरुन्त यो कदम सच्याउनु होस् ।’