काठमाडौं– रियल मड्रिडका पूर्व प्रशिक्षक जिनेदिन जिदानले पुनः स्पेनिस क्लब रियल मड्रिडको प्रशिक्षक बन्न क्लबले गरेको प्रस्तावलाई अस्वीकार गरेको रियलका पूर्व अध्यक्ष रामोन क्याल्डरले बताएका छन् ।

जारी सिजनमा रियलको खराब प्रदर्शन कायम रहेपछि क्लबले जिदानलाई पुन प्रशिक्षकको जिम्मेवारीमा बोलाएपनि उनले क्लबको प्रस्तावलाई अस्वीकार गरेको उनलाई उद्धत गर्दै बीबीसीले लेखेको छ ।

“मलाई त्यो थाहा छ, क्लबका अध्यक्ष (फ्लोरेन्टिनो पेरेज) ले जिदानलाई फोन गरेका थिए र क्लबमा फर्कन अनुरोध पनि गरे । तर, उनले अहिले नआउने बताए,” पूर्व अध्यक्ष क्याल्डरनले भने, “उनले जुनमा फर्किन सक्ने सम्भावना देखाएका छन् ।”

रियलले जिदानको स्थानमा स्पेनका प्रशिक्षक जुलेन लोपेतेगुईलाई ल्याएको थियो । उनको आगमनले क्लबले राम्रो गर्न नसक्दा ४ महिना अगाडि उनलाई पनि बिदा गरेको रियलले यसै सिजनका लागि तेस्रो प्रशिक्षकका रुपमा सान्टीआगो सोलारीलाई भित्र्याएको थियो ।

यो सिजनमा रियल च्याम्पियन्स लिगमा मंगलबार राति भएको दोस्रो लेगमा अजाक्ससँग ४—१ गोल अन्तरले पराजित हुँदै बाहिरि सकेको छ भने कोपा डेल रे बाट पनि बाहिरिसकेको छ ।