काठमाडौं– राष्ट्रपतिको सवारीको विषयलाई लिएर सर्वसाधारणले गरेको विरोधको प्रसंगलाई नागरिक दैनिकले प्रमुखताका साथ छापेको छ । सर्वसाधारणले सवारीका लागि भनेर सडकमा गाडी चलाउन रोक लगाइएपनि आक्रोशित सर्वसाधारणले निषेधको अवज्ञा गरेका थिए । सेना दिवसको अवसरमा आयोजित रात्रिभोजमा सहभागी हुन जानेक्रममा राष्ट्रपतिको सवारी हुने सडकमा लामोसमय सवारीका साधन सञ्चालनमा रोक लगाइएको थियो ।

त्यस्तै कारागारबाट झिकाएर प्रतिनिधिसभा सदस्यको शपथ ग्रहण गराइएका रेशम चौधरीलाई अदालतले टीकापुर घटनाका दोषी ठहर गर्दै जन्मकैदको फैसला सुनाएको विषयलाई पनि प्राथमिकताका साथ छापेको छ ।

त्यसैगरी बैठक टारेर अन्सारीको बाटो खोल्ने खेल शीर्षकको समाचारमा संवैधानिक परिषदबाट मुस्लिम आयोगको अध्यक्ष पदमा सिफारिस भएपछि नागरिकतालगायत विवादमा तानिएका समीम अन्सारी संसदीय सुनुवाइ समितिमा नेकपाका अधिकांश सांसदले नचाहँदानचाहँदै पनि अनुमोदन हुने सम्भावना बढेको छ ।

अन्सारीलाई अस्वीकृत गर्न नेकपा एक्लैको दुई तिहाई पुग्दैन । त्यस्तै नेकपाका सांसदहरु यो विषयमा विभाजित भएकाले स्वीकृतिका लागि बहुमत पनि जुट्दैन । अस्वीकृतिका लागि दुई तिहाई र अनुमोदनका लागि बहुमत समिति सदस्य हुनुपर्ने प्रावधान छ ।