एजेन्सी- फ्रेन्च लिग वान फुटबलमा पेरिस सेन्ट जर्मेन (पीएसजी) ले शानदार जीत निकालेको छ ।

शनिबार राति भएको खेलमा पीएसजीले एन्जर्सलाई ४-० गोल अन्तरले पराजित गरेको हो । घरेलु मैदानमा पीएसजीलाई जित दिलाउन पाब्लो सारबिया, माउरो इकार्डी, इद्रिसा ग्युए र नेयमारले एक-एक गोल गरेका थिए ।

खेलको १३ औं मिनेटमा सारबियाले गोल गर्दै घरेलु टोलीलाई अग्रता दिलाएका थिए । ३७ औं मिनेटमा इकार्डीले गोल गर्दा पीएसजीको अग्रता २-० को बन्यो । ५९ औं मिनेटमा इद्रिसाले गोल गर्दै पीएसजीको अग्रता ३-० को बनाए । त्यसपछि खेलको इन्जुरी समयमा नेयमारले गोल गर्दै पीएसजीलाई ४-० को जित दिलाए ।

जितसँगै शीर्ष स्थानको पीएसजीले ९ खेलबाट २१ अंक जोडेको छ । र, दोस्रो स्थानको नान्टेस भन्दा ५ अंकले अघि छ । एन्जर्स १६ अंक जोडेर तेस्रो स्थानमा छ ।