धनगढी– २९ लाख ८० हजार रुपैयाँसहित कैलालीको धनगढीबाट १ जना भारतीय नागरिक पक्राउ परेका छन् ।

भारतीय नम्बर प्लेट युपी–३१–एके ७३४८ नम्बरको गाडीमा लुकाएर लैजाँदै गरेको अवस्थामा जिल्ला प्रहरी कैलालीको टोलीले ठूलो परिमाणमा नेपाली रुपैयाँसहित भारतीय नागरिकलाई पक्राउ गरेको हो ।

पक्राउ पर्नेमा भारतीय नागरिक अतुल बर्मा छन् । उनले कैलालीको धनगढीस्थित हुलाक कार्यालयको अगाडि गहना पसल समेत सञ्चालन गर्ने गरेको खुलेको छ ।

उनको साथबाट ३ लाख भारतीय रुपैयाँ समेत फेला परेको जिल्ला प्रहरी कार्यालय कैलालीका प्रमुख प्रहरी उपरीक्षक (एसपी) सुदीप गिरीले जानकारी दिए ।

बर्माको साथबाट विभिन्न नेपाली बैंकका ६ वटा एटिएम कार्ड र केही थान खाली चेक पनि फेला परेको एसपी गिरीले बताए ।