काठमाडौं– प्रधानमन्त्री केपी शर्मा ओली दुई साता लामो उपचार पछि शुक्रबार मध्याह्न काठमाडौं आइपुगेका छन् ।
प्रधानमन्त्री ओली शुक्रबार मध्याह्न १२ः३० बजेतिर काठमाडौं आइपुगेका हुन् ।
सामान्यतः राष्ट्रपति, उपराष्ट्रपति र प्रधानमन्त्री विदेश जाँदा र विदेशबाट फर्किँदा नेपाली सेनाले विमानस्थलमै सलामी दिने चलन छ । तर, प्रधानमन्त्री ओलीले उपचारबाट फर्किदा भने सेनाको सलामी लिएनन् ।
यसअघि हुँदै आएको पत्रकार सम्मेलन पनि प्रधानमन्त्री ओली उपचार गरेर आउँदा भएन । तर, प्रधानमन्त्रीको विमान काठमाडौंमा अवतरण गर्दा हुने ‘एयर ट्राफिक जाम’ भने हटेन ।
शुक्रबार पनि ओलीको विमान काठमाडौंमा ल्याण्ड हुनुभन्दा १ घण्टा अगाडिदेखि त्रिभुवन अन्तर्राष्ट्रिय विमानस्थलमा हुने सबै उडान तथा अवतरण ठप्प पारिएको थियो ।
प्रधानमन्त्री ओली स्वदेश आउँदा भएको एयर ट्राफिक जामको मारमा शुक्रबार साझा पार्टीका संयोजक रवीन्द्र मिश्र पनि परे ।
काठमाडौंबाट विराटनगरका लागि विमान चढेका मिश्रले १ घण्टादेखि विमानमै बस्नु परेको आक्रोश सामाजिक सञ्जाल ट्वीटरमा पोखेका छन् ।
शुक्रबार मध्याह्न १२ः१० बजेतिर अपलोड भएको ट्वीटर सन्देशमा मिश्रले भनेका छन्–
ओली जामः
विराटनगर जान प्लेनमा बसेको १ घण्टा भयो । प्रधानमन्त्री ओलीको विमान अवतरण गर्न अर्को आधा घण्टा लाग्छ रे । हाम्रो मात्र होइन, सिंगो विमानस्थलको हाल यही छ । नेपाल भ्रमण वर्ष शुरु हुनु हगावै भीभीआईपी उडानका बेला विमानस्थल व्यवस्थापनको तालिम गर्न हुन विशेष अनुरोध छ ।
मिश्रले आफ्नो ट्वीट संस्कृति, पर्यटन तथा नागरिक उड्डयन मन्त्री योगेश भट्टराईलाई पनि मेन्सन गरेका छन् ।
ओली जाम:
बिराटनगर जान प्लेनमा बसेको १ घण्टा भयो। प्रधानमन्त्री ओलीको विमान अवतरण गर्न अर्को आधा घण्टा लाग्छ रे। हाम्रोमात्र होइन,सिङ्गो विमानस्थलको हाल यही छ। नेपाल भ्रमण वर्ष शुरू गर्नु अगाबै VVIP उडानका बेला विमानस्थल व्यवस्थापनको तालिम गर्न हुन विशेष अनुरोध छ। @yogesbhattarai— Rabindra Mishra (@RabindraMishra) September 6, 2019
प्रतिक्रिया