काठमाडौं– उच्च अदालत पाटनमा नयाँ नियम लागू भएको छ । नयाँ नियमानुसार अब पेशी तोकिएपछि अदालतका न्यायाधीश तथा कर्मचारीले आफ्नो मोबाइलको स्वीच अफ गर्नुपर्ने छ ।

उच्च अदालत पाटनका मुख्य न्यायाधीश नहकुल सुवेदीले मुद्दाको पेशी सूची प्राप्त भएपछि मोबाइलको स्वीच बन्द गर्न निर्देशन दिएका हुन् ।

देशभरकै अदालतमा पेशी तोकिएपछि न्यायाधीश तथा कर्मचारीको मोबाइलका घण्टी बज्ने गरेको र त्यसले अदालती कामकारबाही प्रभावित हुने गरेको गुनासो बढिरहेका बेला उच्च अदालत पाटनमा भने मोबाइलको स्वीच नै अफ गर्नुपर्ने नियम लागू भएको हो ।

मुद्दाको पेशी सूची सार्वजनिक भएपछि कर्मचारी तथा न्यायाधीशहरुको मोबाइल बज्ने क्रम बढ्दै चर्चा बढेपछि मुख्य न्यायाधीश सुवेदीले यस्तो निर्देशन जारी गरेका हुन् ।

सुवेदीले पेशी तोकिएपछि आवश्यक वाहेक अन्य कर्मचारीलाई न्यायाधीशको चेम्बरमा नजान समेत निर्देशन दिएका छन् ।

मुख्य न्यायाधीश सुवेदीले इजलास बस्न नसक्ने अवस्था भएपनि सबै न्यायाधीशलाई अनिवार्य रुपमा अदालती समयमा अदालतमै उपस्थित हुन दिर्नेशन जारी गरेका छन् ।