बलिउडकी ‘आइटम गर्ल’ मलाइका अरोरा र अभिनेता अर्जुन कपुरको प्रेम धेरै पहिलेदेखि चर्चामा छ । यी दुईको सम्बन्धलाई लिएर बलिउडमा फेरि एक चर्चा शुरु भएको छ– अब यी दुईजना छिट्टै विवाह बन्धनमा बाँधिदै छन् ।

स्पटबोइका अनुसार अर्जुन र मलाइका आगामी अप्रिल १९ मा विवाह बन्धनमा बाँधिदै छन् । स्पटबोइको समाचारमा उल्लेख गरिएअनुसार यी दुईको विवाहमा केही सीमित व्यक्ति मात्रै पाहुना हुनेछन् ।

यी दुईले आफ्नो विवाहका केही पाहुनालाई निम्तो नै दिइसकेको पनि समाचारमा उल्लेख गरिएको छ ।

मलाइका र अर्जुनको विवाहमा अभिनेत्री दिपिका पादुकोण, अभिनेता रणवीर सिंह, करिना कपुर खान, करिस्मा कपुर लगायत केही सीमित व्यक्ति पाहुनाको रुपमा उपस्थित हुनेछन् ।

यी दुईजनाको विवाह इसाई परम्पराअनुसार हुने छ ।

यद्यपि, अर्जुन र मलाइका दुवैले भने आफूहरुको विवाह हुन लागेको खबर अफवाह मात्रै भएको बताउँदै आएका छन् ।

हालै एक अन्तर्वार्तामा मलाइकाले अर्जुन कपुरसँग आफ्नो ‘विशेष सम्बन्ध’ भएको स्वीकार गरेपनि विवाहको खबर भने हल्ला मात्रै भएको प्रतिक्रिया दिएकी थिइन् ।