युरोपेली मुलुक नेदरल्याण्ड्समा हरेक वर्ष अध्ययन, रोजगार र भ्रमणका लागि जाने गरेका छन् । धेरैलाई त्यहीँ बसोबास गर्ने चाहना पनि हुनसक्छ ।

त्यहाँ बसोबास गर्न आवश्यक स्थायी बसोबास अनुमतिपत्र पीआर कसरी पाउने होला भन्ने पनि त्यहाँ बसोबास गरिरहेकालाई जिज्ञासा हुने गर्छ ।

कसरी पाइन्छ नेदरल्याण्ड्सको पीआर ?

नेदरल्याण्ड्सले दिने पीआर मूलतः दुई किसिमको वर्गीकरण गरिएको छ । नेदरल्याण्ड्सले युरोपेली मुलुकका नागरिक तथा नेपालजस्ता गैर युरोपेली मुलुकका नागरिकलाई गरि दुई फरक वर्गमा स्थायी बसोबास अनुमतिपत्र प्रदान गर्छ । यसअनुसार नेपालजस्ता गैर युरोपेली मुलुकका नागरिकका लागि नेदरल्याण्ड्सको पीआर पाउन युरोपेली मुलुकका नागरिकलाई भन्दा केही जटिल छ ।

गैर युरोपेली मुलुकका नागरिकले नेदरल्याण्ड्सको पीआर पाउन त्यहाँ निरन्तर ५ वर्षसम्म वैधानिक रुपमा अल्पकालिन बसोबास गरेको दस्तावेज हुनुपर्छ ।

पीआर पाउन आफूसँग आयको पर्याप्त श्रोत भएको र डच समाजमा घुलमिल भएको हुनुपर्छ । त्यस्तै, आफू डच समाज तथा राष्ट्रका लागि सुरक्षा चुनौतिका रुपमा तोकिएको हुनुहुन्न ।

यसपछि राहदानी र अन्य ट्राभल डकुमेन्ट, आय श्रोतको प्रमाण तथा डच समाजमा घुलमिल भएको प्रमाणपत्र तथा १५६ युरो तिरेर पीआरका लागि आवेदन दिन सकिन्छ ।

आवेदकले युरोपेली आयोगको मापदण्ड पूरा गरे–नगरेको त्यहाँको अध्यागमन तथा अङ्गीकृत सेवाले निक्र्यौल गर्छ । आवेदकले युरोपेली मापदण्ड पूरा गरेको निश्चित भएमा आवेदकलाई युरोपेली ‘लङ टर्म रेजिडेन्ट’ सहितको पीआर दिइन्छ । यस्तो किसिमको पीआर पाएकाहरुले युरोपेली युनियन ईयूका अन्य सदस्य राष्ट्रहरुमा समेत गएर बसोबास गर्न सक्छन् ।

तर, युरोपेली आयोगको मापदण्ड पूरा नगर्ने आवेदकलाई भने नेदरल्याण्ड्को राष्ट्रिय मापदण्डमा रही पीआर दिइन्छ । यस्तो पीआर पाउनेले युरोपेली ‘लङ टर्म रेजिडेन्ट’ जस्तो अधिक अधिकारको उपयोग भने गर्न पाउन्नन् ।