काठमाडौं- प्रहरीको खोजीको सूचीमा रहेका आठ जनाको हत्यामा संलग्न नसिम खान पक्राउ परेका छन् । प्रहरीको केन्द्रीय अनुसन्धान ब्युरो (सिआइबी) को टोलीले शनिबार बिहान काठमाडौंको नयाँ बानेश्वरबाट खानलाई पक्राउ गरेको हो ।

अपहरण, फिरौती र हत्याको घटनामा संलग्न खान पछिल्लो समय २०७४ फागुनमा मोहम्मद रहमानको अपहरणपछि हत्यामा संलग्न थिए । त्यसपछि फरार उनलाई प्रहरीले पक्राउ गर्न सफल भएको सिआइबीका एसपी दीपक रेग्मीले जानकारी दिए ।

पक्राउ परेका खानलाई कपिलवस्तु पठाउने तयारी भइरहेको एसपी रेग्मीले बताए । कपिलवस्तुमा श्रृंखलाबद्ध घटनामा संलग्न उनी भारतमा लुकीछिपी बस्दै आएका थिए । खान विभिन्न ८ वटा हत्या घटनामा संलग्न रहेको देखिएको प्रहरीले जनाएको छ ।