काठमाडौं– वैदेशिक रोजगार विभागले म्यानपावर कम्पनीलाई प्रतिनिधि एजेन्टमार्फत काम गराएको पाइए कडा कारबाही गर्ने चेतावनी दिएको छ ।

विभागले विहीबार विज्ञप्ति जारी गर्दै विगतदेखि काम गर्दै आएका एजेन्टमार्फत काम नगराउन म्यानपावर कम्पनीलाई सचेत गराएको हो । एजेन्टमार्फत काम गराएको थाहा पाए त्यस्ता म्यानपावर कम्पनीलाई कडा कारवाही गरिने विज्ञप्तिमा जनाइएको छ ।

विभागले विज्ञप्ति जारी गर्दै वैदेशिक रोजगार ऐन, २०६४ को व्यवस्थालाई केही नेपाल ऐन संशोधन मार्फत संशोधन भइसकेको हुनाले कुनै पनि व्यक्तिलाई वैदेशिक रोजगारको एजेण्टको रुपमा काम नगर्न तथा म्यानपावर व्यवसायीलाई पनि त्यस्ता व्यक्ति नराख्न ध्यानाकर्षण गराएको हो ।

केहि नेपाल ऐन संशोधनले अव वैदेशिक रोजगार व्यवसायीले जिल्ला कार्यालयमार्फत काम गर्नुपर्नेछ । विभागका महानिर्देशक डा. भीष्म कुमार भुषालले एजेन्टमार्फत काम नगराउन म्यानपावरलाई आग्रह गरेका छन् । काम गराएको थाहा पाए कडा कानूनी कारवाही गरिने उनको भनाइ छ ।