अमेरिका– अमेरिकी राष्ट्रपति डोनाल्ड ट्रम्पले चिनियाँ सामानको आयातमा भन्सार शुल्क बढाउने घोषणा गरेका छन् । राष्ट्रपति ट्रम्पले ट्विट गर्दै अर्को साताबाट लागू हुनेगरी २ खर्ब अमेरिकी डलर बराबरका चिनियाँ सामानमा भन्सार शुल्क बढाउने घोषणा गरेका हुन् ।

पछिल्लो समय अमेरिका र चीनबीच व्यापारिक विषयमा छलफल भइरहेका बेला अमेरिकी पक्षबाट एकतर्फी रुपमा चिनियाँ सामानमा भन्सार शुल्क बढाउने घोषणा आएको हो ।

यसअघि चिनियाँ सामानमा १० प्रतिशत मात्र भन्सार शुल्क लाग्दै आएकोमा आगामी शुक्रबारबाट त्यसलाई बढाएर २५ प्रतिशत पुर्‍याइने ट्रम्पको ट्विटमा उल्लेख छ । तर व्यापार वार्ता निकै सुस्त किसिमबाट अघि बढेको भन्दै राष्ट्रपति ट्रम्पले चीनमाथि थप दबाब बढाउनका लागि पछिल्लो घोषणा गरेको हुनसक्ने बताइएको छ ।

अमेरिकी घोषणासँगै सोमबार एसियाली शेयर बजारमा ठूलो गिरावट आएको छ । शाङ्घाईको शेयर बजार सोमबार एकै दिन ५ प्रतिशतले घटेको छ भने एसियाका अन्य शेयर बजारमा पनि मन्दी छाएको छ । हङकङको शेयर बजार पनि ३.३ प्रतिशत घटेको छ ।

सिंगापुरको शेयर बजार ३.३ प्रतिशत र ताइपेईको शेयर बजार १.८ प्रतिशतले घटेको छ । सिड्नी र वेलिङ्टनको शेयर बजारमा एकएक प्रतिशत घटेको छ ।