काठमाडौं–  यातायात व्यवस्था कार्यालय कोशीका लेखापाल सुरेश अधिकारीको ५ करोड १० लाख बराबरको सम्पत्तिको स्रोत नखुलेको भन्दै अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ ।

लेखापाल अधिकारीले गैर कानूनी रुपमा सम्पत्ति आर्जन गरेको भन्दै परेको उजुरीमाथि छानबिन गर्दा अधिकारीसँग ५ करोड १० लाख ३३ हजार ६ सय २३ रुपैयाँ स्रोत नखुलेको सम्पत्ति भेटिएको अख्तियारले जनाएको छ ।

१६ जेट २०५९ मा रोल्पाको तत्कालीन तेवाङ्ग गाविसको सचिवका रुपमा सरकारी सेवा प्रवेश गरेका अधिकारीले सो पश्चात ५ करोड ९८ लाख ६८ हजार ५ सय ८ रुपैयाँ बराबरको सम्पत्ति आर्जन गरेको देखिएको छ ।

अधिकारीले आफ्नी श्रीमती भन्दै ४ जना महिला दूर्गा अधिकारी, दिपा श्रेष्ठ (अधिकारी) सुस्मिता अधिकारी, सोममायाँ श्रेष्ठसहित सासु पुष्प कुमारी निरौला र मामा नाताका बलराम श्रेष्ठको नाममा सम्पत्ति खरिद गरि राखेको अख्तियारको छानबिनबाट खुलेको छ ।

जसमध्ये ८८ लाख ३४ हजार ८ सय ८५ रुपैयाँ बराबरको सम्पत्तिको मात्रै वैधानिक स्रोत देखिएको अख्तियारले जनाएको छ ।

बाँकी ५ करोड १० लाख ३३ हजार ६ सस २३ रुपैयाँ बराबरको सम्पत्तिको स्रोत नखुलेकाले उनी विरुद्ध भ्रष्टाचार मुद्दा दर्ता गरिएको अख्तियार दुरुपयोग अनुसन्धान आयोगका केन्द्रीय प्रवक्ता प्रदीपकुमार कोइरालाले जानकारी दिए ।

अख्तियारले अधिकारीविरुद्ध ५ करोड १० लाख ३३ हजार ६ सस २३ रुपैयाँ बिगो तथा जरिवाना र कैद सायज माग दावी गर्दै मुद्दा दर्ता गरेको छ । अख्तियारले अधिकारीविरुद्ध दर्ता गरेको मुद्दामा उनकी श्रीमती अधिकारी, दिपा श्रेष्ठ (अधिकारी) सुस्मिता अधिकारी, सोममायाँ श्रेष्ठसहित सासु पुष्प कुमारी निरौला र मामा नाताका बलराम श्रेष्ठलाई समेत विपक्षी बनाएको छ ।