काठमाडौं– संघीय संसदको प्रतिनिधिसभामा सरकारको नीति तथा कार्यक्रममाथिको छलफल सोमबार पनि जारी छ ।

प्रतिनिधिसभाको सोमबारको बैठकमा सांसदहरुले सरकारको नीति तथा कार्यक्रममाथि आ आफ्नो धारणा राखेका छन् । नेपाली कांग्रेसका सांसद ज्ञानेन्द्र बहादुर कार्की ले सरकारको नीति तथा कार्यक्र सतही भाषण मात्रै भएको टिप्पणी गरे ।

उनले महत्वकांक्षी, अस्पष्ट, अमुर्त र काम भन्दा प्रचार र प्रोपोगण्डामा केन्द्रीत भएर भाषण र सतहीरुपमा नीति तथा कार्यक्रम आएको बताए । ठुलो ठुलो आयोजनाको कुरा गरेपनि त्यसको ठोस कार्यक्रम नभएको भन्दै उनले हचुवाको भरमा सरकारले नीति तथा कार्यक्रम ल्याएको दाबी गरे ।

सरकारले जनताको सरकार अर्थात् नेपालको सरकारलाई मेरो सरकार भन्न लगाएर राष्ट्रपतिलाई विवादमा तान्ने र गणतन्त्रलाई उपहास गर्ने काम गरेको आरोप उनको थियो । २ सय १८ बुँदामा आएको सरकारको नीति तथा कार्यक्रममा युरिनियम देखि रेलसम्मका छरपस्ट आयोजना घोषणा गरिएको बताए । उनले गत बर्षको १०३ बुँदे नीति तथा कार्यक्रममा प्रस्तुत भएको कार्यक्रम कति पुरा हुन सक्यो भन्ने विश्लेषण हुनुपर्ने तर्क गरे ।

सत्तारुढ दल नेकपाका सांसद कृष्णभक्त पोख्रेलले नीति तथा कार्यक्रम तिथी मिति सहित बस्तुनिष्ठ र बैज्ञानिक ढंगबाट ल्याईएको भन्दै सरकारको बचाउ गरे । राष्ट्रिय गौरवका आयोजनाहरु सम्पन्न गर्ने, संघीय संसद भवन निर्माण , सार्वजनिक जग्गा फिर्ता लगायतका अत्यन्तै राम्रा कार्यक्रम समयसिमा सहित आएको भन्दै उनले अब कार्यान्वयनका लागि सबैले सहयोग गर्नुपर्नेमा जोड दिए ।