नेपालगञ्ज– भारतको लोकसभा निर्वाचनअन्तर्गत उत्तर प्रदेश राज्यमा भइरहेको मतदानका कारण बन्द रहेको नेपाल–भारत सीमा क्षेत्रको जमुनहा सोमबार साँझदेखि खुल्ने भएको छ ।

चुनावी सुरक्षालाई ध्यानमा राख्दै वैशाख २१ गतेदेखि सीमा नाका बन्द गरिएको थियो । नाका बन्द हुँदा नेपालगञ्जको जमुनाहबाट रुपैडिहा हुँदै भारततर्फ जाने सर्वसाधारण, मालबाहक सवारीका साधन अहिले सीमा क्षेत्रमै थन्किएका छन् ।

भारतबाट औषधि उपचारका लागि गएका र रोजगारीबाट फर्किएका नेपालीलाई पैदल हिँडेर आउन दिइए पनि सोमबार निर्वाचनको दिन पूर्णरुपमा आवागमन ठप्प हुने भारतीय सुरक्षा निकायले जनाएको छ ।

भारतको उत्तर प्रदेशमा वैशाख २३ गते हुने लोकसभा निर्वाचनलाई मध्यनजर गर्दै नेपाल–भारत सीमा समन्वय समितिको संयुक्त बैठकले शनिबार साँझ ६ बजेदेखि सोमबार २३ गते साँझ ६ बजेसम्म बाँके र बर्दियाको नेपाल–भारत सीमा नाका बन्द हुने सहमति गरेको थियो ।