काठमाडौं– नेपाल सरकारको एकीकृत सर्भर जीओभीडट्एनपी (gov.np) मा शनिबार साँझदेखि देखिएको समस्या केही मात्रामा समाधान भएको छ ।

शनिबार साँझदेखि सर्भरमा समस्या देखिएपछि आइतबार देशभरका अधिकांश सरकारी कार्यालयका वेबसाइट बन्द भएका थिए ।

आइतबार एकीकृत सरकारी सर्भर डाउन नै भएको थियो । देशको प्रमुख प्रशासनिक केन्द्र सिंहदरबारसहित देशका सम्पूर्ण सरकारी कार्यालयका वेबसाइट खुल्न छाडेका थिए ।

सरकारी सर्भर डाउन हुँदा यातायात व्यवस्था कार्यालय, राहदानी र मालपोत तथा नापी कार्यालयको काम बढी प्रभावित भएको थियो ।

सर्भर डाउन हुने समस्यामा केही मात्रामा सुधार आए पनि यातायात व्यवस्था कार्यालयको काममा भने केही अवरोध नै रहेको यातायात व्यवस्था विभागका एक कर्मचारीले बताए ।

‘आइतबार सर्भर डाउन भएकाले सोमबार साइटमा धेरै ट्राफिक आएको छ, सर्भर केही व्यस्त भएको छ,’ यातायात व्यवस्था विभागका एक कर्मचारीले भने, ‘दिउँसोदेखि पूर्ण रुपमा शुचारु हुने अपेक्षा गरेका छौं ।’