एजेन्सी– श्रीलंकाली प्रहरीले दुई साताअघि इष्टर सन्डेका दिन २५० जनाभन्दा धेरैको ज्यान जानेगरी भएका श्रृङ्खलाबद्ध बम आक्रमणमा संलग्न लडाकुले प्रयोग गरेको तालिम केन्द्र फेला पारेको छ ।

पूर्वी शहर कट्टनकुडीमा प्रहरीले १० एकड क्षेत्रफलमा रहेको तालिम केन्द्र फेला पारिएको प्रहरीले जनाएको हो ।

आक्रमणकारी लडाकुले त्यस क्षेत्रलाई बम बनाउन तथा बन्दुक चलाउने तालिम लिनका लागि प्र्रयोग गरेको हुनसक्ने प्रहरीको अनुमान छ ।

आक्रमणका मुख्य योजनाकार मानिने इस्लामिक अतिवादी जहरान हासिमको बासस्थान रहेको क्षेत्रनजिक रहेको तालिम केन्द्रको साँघुरो परिसरमा ४ तल्ले वाच टावर, एक भवन, कुखुरा र बाख्राको खोर तथा आँपका केही रुखहरु रहेको जनाइएको छ ।

तालिम केन्द्रमा प्रहरीले गोली लागेका प्वाल तथा बम बनाउने क्रममा प्रयोग भएका केही सामान बरामद गरेको जनाएको छ ।

प्रहरीले त्यस जमिनका दुई धनीलाई गिरफ्तार गरी आवश्यक अनुसन्धान अघि बढाएको जनाएको छ ।