काठमाडौं– एम्नेष्टी इन्टरनेशनलले संयुक्त अरब इमिरेट्स युएईले पश्चिमा मुलुक तथा अन्तर्राष्ट्रिय समुदायले पठाएको हतियार युद्ध अपराधमा संलग्न रहेका लडाकुलाई दिने गरेको आरोप लगाएको छ ।

एम्नेष्टी इन्टरनेशनलले विज्ञप्ति जारी गर्दै पश्चिमा मुलुकले पठाएको अर्बौँ डलर बराबरको हतियार युएइले यमनका लडाकुलाई पठाउने गरेको आरोप लगाएको हो ।

युएईको यस्तो गतिविधिले उसैपनि ठूलो मानवीय संकट झेलिरहेको यमनको अवस्था झन् खराब बन्दै जाने एम्नेष्टीले जनाएको छ ।

इरानको समर्थनप्राप्त हुथी लडाकुविरुद्ध यमनमा साउदी अरब नेतृत्वको सैनिक गठबन्धनले गरिरहेको सैनिक कारवाहीमा युएइको महत्वपूर्ण भूमिका रहँदै आएको छ । युएइले यमनको दक्षिणी तथा पश्चिमी तटीय क्षेत्रमा हुथीविरुद्ध लड्नका लागि स्थानीय लडाकु तथा यमनी सरकारी फौजलाई सैनिक तालिम तथा अन्य सैन्य सहयोग गर्दै आएको छ ।

युएइसहित अरब गठबन्धनले सहयोग गरिरहेका फौज तथा लडाकुहरु यमनमा युद्धअपराधमा संलग्न रहेको भन्ने समाचार पनि बेलाबेला आउने गरेको छ ।